Unahin Ang Diyos Sa Ating Buhay

Unahin Ang Diyos Sa Ating Buhay.

By: Bro. Aye Buncayo Ferrer

Household Head CFC Gulang-Gulang Chapter

“You must seek first the Kingdom of God and His righteousness and all of these things will be added to you.” seek first the kingdom of God and his righteousness, and all these things will be given you besides” (Matthew 6:33).

Sa tagalog, “Ang pangako ng Diyos sa atin ay kung uunahin lamang natin Siya sa Ating buhay, Lahat ng bagay idadagdag Niya sa Atin.

Lahat ng bagay ay idadagdag sa Atin? Sabi ko noon, nang mabasa ko ito. Ano ba ito? Lahat ng bagay daw ay idadagdag sa Atin? Paano ba yun?

Nung alalalahanin ko ang buhay naming mag-asawa at buhay ko mismo bago ako magjoin sa Couples For Christ or bago ko lubusang makilala si Lord.  Noon, talagang magulo kami, lalo na ako, may utang, problema ko pa din ang aming bahay na hindi nababayaran ng ilang buwan at umabot ng taon na halos ay kukunin na ng Developer, Walang Savings at Investments as in walang-wala talaga, lapsed pa ang insurance ko, pati education fund ng anak ko, ang kotse hindi maipaayos. Dahil wala akong pera ay nangyari sa akin na ang alkansya na inipon naming barya ay sinusundot ko para lang magkapera ako. Ang problemang yun ay apektado lahat, pati ang pamilya namin pareho, at kasama na rin ang mga kaibigan namin, ang anak namin na si Candice ay nagkakasakit pa, problema din pati pagpapagamot at malimit kaming mag-away ng asawa ko, at noong panahon ding iyon, talagang hindi na ako makilala ng aking asawa, pamilya ko at ng mga kaibigan namin, iba na ang tingin sa akin. Naging magulo ang buhay ko, nabago ang tingin nila sa akin, dahil sa nakikita nilang hindi magandang ginagawa ko.

Walang magandang nangyayari sa akin noong panahon na yun, kahit anong gawin ko sa aking negosyo at makipag usap sa tao, malayo ang swerte o biyaya na aking gusto. Kaya ang tanging ginawa ko, dahil wala na akong ibang maisip na gawin kundi humingi ako ng advise sa dalawang Ninong ko sa kasal sa katauhan nina Ninong Chito at Ninong Tony. Isang gabing nag-iisa ako sa kwarto, saka ko lang nakita ang sarili ko, unti-unti na pala akong lumulubog sa kumunoy ng buhay, noon ko lang nakita ang aking sarili na lubog na ako, dahil wala ako sa tamang isip, dahil pagpapakasaya lang sa aking sarili ang naiisip ko, hindi ko naiisip na sa ginagawa ko ay napakadaming nadadamay. Napaiyak talaga ako at wala akong ibang ginawa kundi ang magdasal na lang ng malalim kay Lord. Wala akong narinig na sagot, siguro maaring inakay na ako ni Lord at iniaahon na sa kumunoy na aking pinaglalagyan ng mga oras na iyon. Noon din, naalala ko na maaaring inaakay nga ako ni Lord, para umuwi sa aking asawa at anak. Dahil noong panahong iyon na may matinding problema ako at ng asawa ko ay umalis ako sa aming bahay at iniwan ang aking asawa at anak. Pero kusa na din akong bumalik at sa pagbalik ko lahat ng bagay na alam kong makakasama sa akin ay tuluyan kong iniwan at anuman ang kakaharapin ko sa pagbabago ay tatanggapin ko, yun ang pangako ko sa sarili ko at ipinagdasal kay Lord. Habang pauwi ako sa bahay at harapin ang aking asawa at anak ay walang tigil ang pagdadasal ko ng Ama Namin, hindi ko na nabilang kung gaano kadami yun,dahil nais ko ay magkaroon ako ng guide mula kay lord sa pagharap ko sa aking asawa at anak para sa Tamang Daan ng aking buhay.

Paano ko ba nadamang kasama ko si Lord?

Maayos kaming nag-usap ng asawa ko, maaring noon nga ay pumapagitna na si Lord sa aming mag-asawa. Totoo nga ang nasa bibliya, Sabi sa Mateo 18:19-20 “Sinasabi ko sa inyo: kung ang dalawa sa inyo o higit dito sa lupa ay magkaisa sa paghingi ng anumang bagay sa inyong panalangin, ipagkakaloob ito sa inyo ng aking Amang nasa langit. Sapagkat saan man, may dalawa o higit na nagkatipon-tipon dahil sa akin, naroon akong kasama nila.”

Salamat sa asawa at anak ko, salamat sa pamilya ko at mga kaibigan ko, at inakay nilang muli ako sa panibagong buhay na ang laging sentro at una sa buhay ko at ng pamilya ko ay si Lord. Pero alam nyo ba na kapag nangyari pala yung bagay na nalulubog ka sa kumunoy ng buhay ay malalaman mo kung sino ang totoo sa iyo. Pero, Hindi ko na inisip kung may mga nalaman ako, Kung Sino ba ang mga totoo sa akin, sa kabila noong panahon na ako ay nasa madilim na sitwasyon. Ang pinakamahalaga sa lahat ay tanggapin ko ang sarili kong pagkakamali, at ang buhay ko ay ilaan sa pamilya ko at kay Lord para sa tamang buhay na nais kong tahakin at maging instrument ni Lord sa aking kapwa. 

Nagsimula na kaming sumali sa Couples For Christ at nagsimulang umattend sa Christian Life Program (CLP) ng Couples For Christ. Gumamit sya ng mga tao upang maging instrumento niya para tuluyan akong akayin sa tuwid na daan ng buhay. Pero alam nyo ba, kahit ako akala ko simula na iyon para tuluyang mabago ang buhay ko, Ganun pa din, habang nag aaral kaming mag-asawa ng Espiritwal na pag-aaral bilang isang ganap na Kristiyano ng Katoliko Romano (Roman Catholic). Sabi ko siguro nung mga oras na iyon, ang kauna-unahang nagagalit o naiinis sa akin ay ang masamang espiritu. Totoo nga, ang nasa bibiliya, Lucas 11:24-26 “Kapag lumabas na mula sa tao ang isang masamang espiritu, ito’y gumagala sa tigang na lugar at naghahanap ng mapagpapahingahan. Kung walang matagpuan ay sasabihin nito sa sarili, ‘Babalik ako sa bahay na aking pinanggalingan.’ Pagbabalik ay matatagpuan niyang malinis na ang bahay at maayos. Kaya, lalabas siyang muli at magsasama ng pito pang espiritung masasama kaysa sa kanya.”

Kaya naman pala nung habang lumalapit kami at lubusang nakikilala si Lord, nariyan pa din ang matinding problema. Dumating ang panahon na talagang ayaw ko ng ituloy pati ng asawa kong si Christine ang Christian Life Program ng Couples For Christ. Malapit pa din kasi ang problema, nag aaway pa din kaming mag asawa, pakiramdam ko nga mas matindi pa. Sabi ko nga, akala ko ba pag lumalapit kay Lord nawawala ang problema, yun ang sabi nila sa kanilang sharing ah, sa Christian Life Program po yun. Pero mas malakas talaga ang Banal na Espiritu, kusang inilalapit ang sarili ko sa maayos na buhay. Kapag nagkakaproblema kaming mag asawa, ang ginagawa ko na lang ay dasal ng dasal, kahit nagagalit ang asawa ko, sa gitna ng aming pag aaway at pag tumigil ang asawa ko, hawak ko ang bible at nagbabasa ako, pakiramdam ko kinakausap ako ni Lord, sabi niya dahil nabasa ko sa bible “Magpatuloy ka lang, Huwag kang matakot at mag alinlangan”. Patunay lang iyon na sadyang ang buhay natin ay walang mababago, kung lalapit tayo kay Lord, pero ang isang maganda dahil nakikilala natin si Lord ng lubusan mas lalo tayong tumibay, dahil sabi nga ni Lord sa Jeremias 29-11 “Sapagkat batid kong lubos ang mga plano ko para sa inyo, mga planong hindi nyo ikakasama,kundi para sa inyong ikakabuti. Ito’y mga planong magdudulot sa inyo ng kinabukasang punong-puno ng pag-asa.”

Iyon ang salitang pinaniwalaan ko. Patuloy lang kami sa bawat araw ng aming buhay, patuloy na naniniwala at nanampalataya kay Lord, syempre sadyang si Lord ay gumagamit ng mga tao, na instrumento niya para mas higit siyang makilala. Naisip ko tuloy, siguro isa ako sa kanyang tupa na nawala at ng matagpuan ay ipinagdiwang. Ganun ang nangyari sa akin, sa aking tahanan, sa aking pinagtatrabahuhan ginamit ang aking Ninong Chito Maliwanag para akayin akong muli sa tuwid na daan, at tinanggap nila akong muli na masayang masaya at ako naman tinanggap ko ang aking pagkakasala at tuluyang tinalikdan ang bagay na alam kong makakasama sa akin. Nagkakamali pa din naman ako, hindi naman ako perpekto eh. Pero ngayon, ang alam ko ay may matindi akong sinasandalan at pinaniniwalaan. Sabi ko nga, anumang laki ng problema o pagsubok ang dumating sa aking buhay alam ko mas malaking-malaki si Lord sa aking buhay.

At alam nyo ba ang naging magandang plano ni Lord sa buhay ko, bilang isa na ngayong masasabi kong ganap na Kristiyano ng Katoliko Romano at active member at household head ng Couples For Christ. Una, natuto ako ng tamang pagdadasal, napakasarap na laging nakikipag usap kay Lord, maginhawa sa pakiramdam. Syempre dahil malimit ako magbasa ng bibliya na nalaman ko din na kailangan basahin ang banal na aklat bukod sa nagdadasal kay Lord. Kasama pa yung sarap ng pakiramdam na pag gising sa umaga ay kasama ko ang aking mahal na asawa at anak at hahalik sa iyo at sasabihin nyo sa isa’t isa ay ang matamis na I LOVE YOU. Hinding-hindi ko pagsasawaan na ibahagi ang nangyayaring ito sa buhay ko.

Sumunod ka sa akin at gagawin kitang mamalakaya ng tao.

Natuto din ako magdasal ng maayos, malimit humingi ng patawad, magpasalamat at syempre hindi ako ipokrito para humingi ako ng mga biyaya kay Lord. Lalo akong mas natutong magdasal nung tawagin kaming mag-asawa ni Lord na maging Facilitator sa Christian Life Program (CLP), ang nakakatuwa eh hindi pa nga kami nakakaisang taon or hindi pa kami mismong hinog para maglead sa mga bagong magiging member ng Couples For Christ. Naisip ko tuloy, kaya ko bang gawin iyon. Nakapag lead na ako ng mga tao, dahil sa work ko naglead ako ng tao at involved din ako sa mga civic organization, pero yung espiritwal na pamumuhay kaya ko bang gawin, sabi ko parang mahirap yata. Pero syempre dahil tinawag kami ni Lord, at alam ko may magandang plano sya sa akin at sa aming mag asawa, kaya gumamit sya ng mga tao, syempre iyon ay sa katauhan naman ng aking household head sina Bro. Vbhoy Tanola at Sister Rovie Tanola, sila rin yung ilan sa mga nag invite sa amin sa Couples For Christ, dahil napakaraming nag iinvite sa amin, nariyan ang aking Ninong Chito, Tito Rael Aguilar, tita Vivian Coronado at syempre ang chapter head na sina Bro Bong Rairata at Sis Noreen Rairata na ginamit ni Lord para personal kaming kausapin na maging facilitator sa gagawing Christian Life Program ng Chapter namin. Alam nyo ba, nakakatuwa pa ang nangyari, umattend kaming mag asawa ng facilitators training ng CFC para nga sa CLP, akala namin eh madami kami, aba eh kami lang palang mag asawa at yung mag asawa ni Bro Fhio Estuita at Sis Joan Estuita ang tinawag. Sadyang si Lord eh nakakatuwa, kasi sinet-up kaming mag-asawa. Divine Intervention siguro yung nangyari.

Pero nung gabing iyon pag uwi namin sa bahay, bago ako matulog, Ito ang nabasa ko sa bibliya “Mateo 4:19 “Sumunod kayo sa akin at gagawin ko kayong mamalakaya ng mga tao”. Nangilabot talaga ako, kasi alam nyo ba, pagkatapos kasi ng Facilitators Training, sabi namin mag asawa pwede bang Facilitator lang kami, pero pagkatapos ng CLP eh member lang ulit kami, nakatawa lang sina Kuya Bong sa amin.

Sa pagsunod kay Lord, unti-unti ko naramdaman ang presenya ng kanyang banal na espiritu, Dahil nung nagCLP na at nagsisimula na nga kaming magfacilitate, mismong asawa ko na si Christine ang nagsabi na, mahirap naman palang iwan na lang ang mga participants ng CLP na aming hawak, sa kanyang bibig mismo lumabas na gusto na niyang maglead para sa espiritwal na buhay. Sa pakikipag usap sa aking mga member, ang mga salita ni Lord ang ginagamit ko. Dahil pagbuklat ko sa aking bible, ang sagot sa mga tanong ay nasa bibliya. Ang bait ni Lord talaga kaya tama lang na unahin natin lagi si Lord sa ating buhay.

Sunod-sunod na Biyaya.

Simula noon, sunod –sunod na ang mga biyayang dumating sa buhay namin ng pamilya ko. Mas masarap at lagi kong gustong i-share ay ang mga biyaya, may mga pagsubok or trials na dumadating pero si Lord hindi ko halos mabilang ang mga biyayang dumating sa buhay ko. At totoo nga, yung mga nagpapabigat sa atin, unti-unti inaalis ni Lord, iyun ang mga bagay na magiging dahilan para hindi ka na makagawa pa ng bagay na alam mong makakasama sa atin at sa ating pamilya at trabaho.

Ang bahay namin ay naayos, nabayaran namin ang utang, unti-unti nagkakasavings na ulit, naayos na ulit ang insurance ko at syempre yung plan ng anak ko, syempre kailangan may savings at insurance, kailangan natin maghanda,kaya nga maririnig mo kay Candice ngayon, 6years old pa lang alam na ang stock market at insurance. Kahit nga pag nagkwento kami na napasok ng magnanakaw ang bahay namin, masasabi pa din namin, na si Lord sa pamamagitan ng Holy Spirit ay sadyang nakapatnubay, dahil biruin mo sinira at napasok ng magnanakaw ang bahay pero ang nangyari nagkaroon ng extension ang bahay namin, mas lumawak at gumanda pa. Syempre kung walang savings or hindi kami naghanda baka hindi namin naipagawa yung likuran ng aming bahay. Sa bibliya kaya eh nagbilin din sa atin, Lucas 12:35 “Maging Handa kayong lagi.”

Kami naman ng asawa at anak ko, laging masayang magkakasama araw-araw. Maririnig mo pa sa mga kaibigan namin ngayon ang tawag sa amin ay Holy Family. Ang sarap pakinggan. Praise the Lord! Si Christine sa kanilang school kahit madaming gawa eh maayos pa din naman, si Candice maayos din sa pag aaral, champion pa nung sumali ng singing contest at best friend ng lahat ng classmate nya. Ang bait ni Lord talaga. Mabilis pating sumagot si Lord lalo na kung kailangan natin agad siya, nangyari nga nawala yung cellphone ni Christine, nagalit si Christine at ako ay nainis din, ang ginawa ko na lang pumunta sa simbahan para magdasal, at para mawala agad ang galit, biruin mo answered prayer agad, kasi kung iisipin mo wala na yung cellphone, itapon lang yung simcard nun eh hindi ko na mahahanap yun, pero ang nangyari, paglabas ko sa simbahan, nagring ang cellphone at yung number ng cellphone ni Christine ang natawag at sinabi nung kausap ko na sila daw ang nakakuha ng cellphone. Praise the Lord!

Kahit sa personal kong ginagawa ang pagtatrabaho at business ko, ramdam ko nariyan si Lord, biruin nyo, tuloy tuloy ang pasok ng production,maliit man o malaki blessings yun ni Lord, nagtataka pati ang mga client ko, kasi salita ni Lord ang ibang naririnig sa aking presentation, kusang ibinibigay ni Lord, hindi lang basta income, kasi masasabi kong siksik, liglig at umaapaw pa ang ibinibigay ni Lord sa akin. Totoo ang nababasa natin sa bibliya, Lucas 6:38 “Siksik,Liglig at Umaapaw.”

Natuto na din akong magbigay kay Lord, hindi yung pag sumimba lang tayo saka tayo nagbibigay. Dahil sa Couples For Christ, magagawa natin yung magbalik ng mga biyaya para sa gawain ni Lord, kasi merong Voluntary Monthly Contribution, aba eh pagbabalik yun para sa mga biyayang ibinigay ni Lord sa atin sa loob ng isang buwan.

Totoo naman pag nagbigay tayo kay Lord, sadyang higit pa ang ibinibalik niya sa atin. Tunay kong naranasan na kay Lord walang imposible sa kanya. Basta gawin natin yung ating parte at patuloy lang na manalig at maniwala ay si Lord ang bahala sa atin. Sa Lucas 6:38 pa din ito ang sabi, “Magbigay kayo at kayo’y bibigyan. Hustong takal, siksik, liglig at umaapaw ang ibibigay sa inyo. Sapagkat ang panukat na ginamit sa iba ay siya ring panukat na gagamitin sa inyo.”

Ano ang nangyari nung magsimula akong magbigay kay Lord?

Sabi ko nga gusto ko makapunta ako sa Hong Kong, Iyon ang laging isinasabi sa akin ni Ninong Chito Maliwanag, lagi akong nagdadasal kay Lord, sabi ko gusto ko makapunta sa Hong Kong, syempre dun sa Disneyland, gusto ko din syempre kasama ko ang aking asawa at anak, kaya kailangan makaclose ako ng malaking business. Alam nyo ba, hindi lang ako basta nakaclose ng malaking business, ang nangyari eh biglang nagpromo ang company ko ang Philam Life, Tara na Sa Hong Kong Agency Sales Kick-0ff sa Hong Kong, alam nyo ba FREE yun, ALL EXPENSES PAID, napakabait ni Lord, may malaki na akong income, nakapunta pa ako ng Hong Kong ng walang gastos. Kaya lang ayaw ng asawa ko, magskedyul daw kami ng kaming tatlo lang, sulitin ko daw yung pinaghirapan ko. Ito pa, sabi ko sa Disneyland ako pupunta pagdating sa Hong Kong, akalain mo, nameet ko pa pala yung isang promo pa ng Philam Life, FREE na ang pagpunta sa Hong Kong, aba eh FREE pa din ang pag punta ko sa Disneyland, nakasama ko pa sa Lunch Meeting an gaming Philam Life President na si President Rex Mendoza sya lang naman ay isa sa matalik na kaibigan ng sikat na Spiritual at Financial Preacher na si Bo Sanchez, meron pa akong Free Jacket at MyPhone Cellphone, touchscreen, with Camera & Video, may TV,WIFI, Radio, may memory card at may presentation pa na magagamit ko pa sa client, ang galing ni Lord di ba. Praise the Lord! Napakabait talaga ni Lord sa atin, tunay nga na wala sa kanyang imposible, basta magserve lang tayo, maniwala at manalig sa kanya, patuloy na magdasal at magserve, at magbalik or magbigay ng biyayang galing sa kanya. Totoo ang isinasabi na huwag nating subukan si Lord sa kanyang kakayahan, dahil walang imposible sa kanya kapag nagbigay tayo, ito yung sinasabi sa bibliya, Malakias 3:10 “Subukin ninyo ako sa bagay na ito kung hindi ko buksan ang mga bintana ng langit at ibuhos sa inyo ang masaganang pagpapala.”

Isa pang magandang nangyari, nagserve kami ng aking household group sa Couples For Christ sa Kiwanis Homes for the Aged  nung Christmas at nagbigay ng pamaskong Handog sa mga bata at sa mga Lola, alam nyo ba, napatunayan ko na naman kung magbalik si Lord, higit pa talaga sa ating ibinibigay, ganito yun, ang inilabas kong halaga sa pagbibigay ay Php 1,500, para sa mga bata at matatanda, alam nyo ba after a week lang, sumagot si Lord, nagbigay sya ng production sa akin, at alam nyo kung magkano ang income ko, Php 15,000, biruin nyo, 10x ang ibinigay nya sa akin.

Isa pa yung pagbibigay ko sa typhoon PABLO dahil may isang TV Show ako na napanood na nangangalap ng donation sa typhoon victim, nagdonate lang ako ng Php 500, ang ibinalik ni Lord sa akin, Php 200,000 Sales Production, kaya iyon nakasama nga ako sa Hong Kong.

At yung pagbibigay namin ng Time,Talent at konting Treasure sa Couples For Christ during Christian Life Program bilang kaming mag-asawa ay Assistant team leader, nagbigay ako ng Php 2,500 worth of Song book, aba biruin nyo mahigit Php 25,000 Commission ang ibinigay ni Lord. At tuloy tuloy ang biyaya, dahil madami ang nagbibigay para mas gumanda yung Christian Life Program, naging galante ang CLP, totoo nga habang nagbabalik tayo ng biyayang ibinigay ni Lord sa atin, kusang may darating mula kay Lord. Totoo talaga, kailangan unahin natin si Lord sa lahat ng mga gagawin natin. Sabi sa bibliya, 2 Corinto 9:8 “Magagawa ng Diyos na pasaganain kayo higit pa sa inyong pangangailangan – upang may magamit kayo sa pagkakawanggawa.”. Pero syempre may bilin si Lord sabi niya 2 Corinto 9:7 “Ang bawat isa ay dapat magbigay ayon sa sariling pasya, maluwag sa loob at hindi napipilitan lamang, sapagkat ang ibig ng Diyos ay kusang pagkakaloob.” Biruin mo 10% lang naman ang hinihingi ni Lord sa atin pero higit na biyayang pagpapala ang ibinabalik sa atin.  May nabasa ako, kung tayo ay naniniwalang si Lord ang nag mamay ari ng lahat bagay at siya ay itinuturing nating business partner kaya tayo pinagpapala, bilang partner magkano ba ang dapat natin ibalik, naisip ko kapag business partner dapat 50/50 ang hatiaan. Biruin mo napakabait ni Lord, kasi 10% lang ang hinihingi niya sa atin, tapos bahala na tayo sa lahat. At yung 10% na pagbabalik natin kay Lord, ang bumabalik sa atin ay hindi mabilang na biyayang higit pa sa ating mga gusto o pangangailangan.

Kaya nga patuloy akong nagsasabi na Unahin natin si Lord. Walang mawawala sa atin, mas lalo tayong nabibiyayaan, ang mga agam-agam sa ating buhay ay natatanggal at tuluyang nawawala ang mga galit sa buhay, madami pa tayong napapasaya. Kaya Unahin lang natin si Lord sa ating buhay at lahat ng bagay ay idadagdag sa ating buhay. AMEN.